احمد نصرالله يكتب: الاسماعيلاوية بياكلوا في بعض لية ؟؟

الأحد 23 أبريل 2017 - 11:28 صباحاً

احمد نصرالله يكتب: الاسماعيلاوية بياكلوا في بعض لية ؟؟

احمد نصرالله


اسماعيلية اونلاين :

بدايه احب ان أؤكد انه ليس لايه جهه او كيان او اشخاص اي مسؤليه في تنظيم المؤتمرات الرئاسيه او الاحداث و الفعاليات الرسميه سوي وزاره الشباب و الرياضه او اداره المراسم او المكتب الاعلامي برئاسه الجمهوريه هذا من ناحيه...
اما من الناحيه الاخري و هو موضوع البوست اصلا فاحنا عايزين نعرف و اخرتها مع بعض يا اسماعلاويه...؟ ليه احنا دايما عاملين في نفسنا كده...؟ حتقولولي عاملين ايه بالظبط حقولكم و اتمني ان يتسع صدر الجميع لكلماتي... يا جماعه احنا المحافظه الوحيده تقريبا اللي ناسها بتاكل في بعض علي الفاضي و المليان علي الهايفه و اللي تستاهل..!!! احنا تقريبا اكبر محافظه بتعمل دوشه علي الفيسبوك بداعي او بدون داعي...!! احنا كتير من ناسنا للاسف سواء كبار او شباب بيهتموا اوي بالتقطيع و التشهير و نيجي بقي لحدث الموسم اللي هو مؤتمر الشباب ... "مين اللي رايحين ؟ " مممم "طب رايحين ليه ؟ " مممم "طب و مين اللي اختارهم ؟ " ممم " طب و اشمعني سيد و محمد مخدوش زيد و عبيد ليه ؟ " ممم " دول مش حيعملو حاجه " " لا اصل دول تبع مش عارف مين و دول تبع الفضاء الخارجي :) " يااااااااااااه في ناس كده قاعده عشان تسجل موقف لمجرد تسجيل الموقف و في ناس قاعده عشان تهدم اي حاجه و اي كيان و اي حد لان مبدأهم في الحياه " مش مهم اكون افضل المهم انك تفشل " يعني يشوف فلان حط طوبتين فوق بعض بدل ما يعليهم بطوبتين تانيين يقوم هاددهم من اساسه و هكذا... يا جماعه في ناس محترمه و جدعان كتير في الاسماعيليه مستاءه جدا من الاوضاع دي لانها عمرها ما حتخلي المجتمع المدني او الشباب او حتي كل المهتميم بالشأن العام يتقدموا خطوه واحده.. لازم نعرف ان احنا للاسف اللي بنسوء سمعه محافظتنا بإيدينا و خدوا بالكم من حاجه احنا عمالين بننادي باهتمام الدوله و القياده السياسيه بالاسماعيليه و مشاكلها و بطالتها و هكذا و عمالين بنقول ان بلدنا مظلومه في كيت و كيت و عايزين مؤتمرات هنا و لقاءات هنا مش كده ؟!! و طالبنا ان يكون في مؤتمر في الاسماعيليه يخص شباب مدن القناه مثلا اسوه بما تم مع شباب الصعيد في اسوان قوم بقي لما الفرصه تيجي لحد هنا بدل ما نتكاتف كلنا عشان نظهر بلدنا بصوره جميله مجتمعيا - و مش قصدي علي الرصف و تنضيف الطرق انا قصدي علي تنضيف النوايا و النفوس - بدل ما نعمل كده و نبقي كلنا في ضهر الناس اللي حتشارك مهما كان هما مين لو يعرفوا يمثلونا كويس يبقي خير و بركه - لكن مش حيسلموا من التقطيع برضو مهما كانو مميزين - و لو ميعرفوش يبقي نقف جنبهم و نساعدهم و نديهم افكار او ورق عمل و خلافه لان ده امر واقع و لابد من التعامل معاه و الاستفاده منه لصالح المحافظه.. يا جماعه مش مهم مين اللي بيجيب الجون المهم الفرقه تكسب للاسف احنا مش مقتنعين بكده غير في الكوره بس كلنا بنحب الدراويش يكسب و مش مهم مين بيهدف حتي لو كان لعيب ملوش لازمه و لا جت معاه بالبركه لكن شعبيا او مجتمعيا لااااا لازم انا و انا و انا و ان مكانش انا يبقي لازم صاحبي و حبيبي يا إما نعلن الحرب علي الجميع... محدش واخد باله ان ده بيظهر الاسماعيليه بشكل سلبي للغايه عند كل مؤسسات الدوله و عند اي حد تاني بيفهم و طالما بيثار كل هذا اللغط إذن اسهل حاجه بعد كده انها تبقي مره تفوت و لا حد يموت يا اسماعيليه و نبقي نشوف مين حييجي زياره و لا يعمل مؤتمرات او فعاليات هنا تاني... يا جماعه الخير يا اخواتنا و صحابنا و اهالينا يا اعزائي النشطاء و صناع الراي العام و الاعلاميين ارجوكم نحب و نخاف علي بعض و نكبر و نساعد بعض شويه اكتر من كده... اذكركم بحديث النبي صلي الله عليه و سلم " لا يؤمن احدكم حتي يحب لأخيه ما يحب لنفسه "... اسف جدا للاطاله لكن هما كانوا كلمتين محبوسين جوا الواحد من زمان و ما اثير من لغط و هري و فتي في اليومين تلاته اللي فاتو اجبروني اني اقلهم و الارزاق علي الله...
دمتم طيبين :)
بيع واشتري اللى نفسك فيه

مواقيت الصلاة
حالة الطقس
اسعار العملات